Өзбекстанда калк тарабынан чет элдик валюталарды сатып алуу күчөдү. Борбордук Банктын билдиришинче, быйылкы алгачкы төрт айда эл тарабынан 1,1 миллиард доллар сатып алынган. Бул тууралуу Podrobno.uz жаңылыктар агенттиги жазып чыкты.
Алынган маалыматка караганда, ички валюта рыногундагы жалпы операциялардын көлөмү төрт айда 5,4 миллиард долларды түзгөн. Бул өткөн жылдын ушул мезгилине салыштырмалуу 1,3 миллиард долларга, 2018-жылдын ушул мезгилине салыштырмалуу 1,8 миллиард долларга көп.
Борбордук Банк билдиргендей, алмашуу пункттары аркылуу жеке тараптар соодалаган чет элдик валютанын көлөмү 1,5 миллиард долларды түздү. Өткөн жылдын ушул мезгилинде сатылган чет элдик валютанын көлөмү 884 миллион доллар экенин эске алсак, 1,7 эсе өсүү болгону байкалат. Ошол эле кезде жеке тараптар аркылуу сатып алынган чет элдик валютанын көлөмү 1,17 миллиард долларды түзгөн. Бул болсо, өткөн жылдын алгачкы төрт айына салыштырмалуу 3,4 эсеге көптүк кылат. Өткөн жылы 346 миллион доллар сатып алынган эле.
Деген менен, апрель айынын акыркы он күнүндө жеке жактардын банктарга саткан чет элдик валюталардын көлөмү биринчи жана экинчи он күндүккө караганда 2,5 эсе өскөн. Башкача айтканда, 1- жана 2-он күндүктө 3,8 миллион доллар сатышса, акыркы он күндүктө анын көлөмү 9,6 миллион долларга жеткен.
