Өзбекстандагы картошканын быйылкы жаңы түшүмү алынып, Украинага дүңүнөн экспорттоону баштаган. Бул тууралуу EastFruit порталына шилтеме берүү менен Podrobno.uz жаңылыктар агенттиги жазып чыкты.
Экспортко жакшы сапаттагы өзбек картошкасы килограммы 15-17 гривенден (килограммы 57-64 центтен) жөнөтүлүүдө. Деген менен, рыноктун катышуучуларынын билдиришинче, өзбек картошкасынын сатылышы улам кыйындап баратат, анткени Украинанын арзан баадагы жаңы жетилген картошкалары базарларда көбөйүүдө. Анан калса, Украинанын картошкасынын сапаты да жогору болууда, себеби ал кыска убакта эле талаадан дароо кардарларга жеткирилет.
EastFruit компаниясынын эксперттери билдиргендей, мурда Украина өзбек картошкасын импорттогон эмес, себеби Өзбекстан өзү да картошканын ири сатып алуучусу болуп саналат. Ал жылына 150дөн 300 миң тоннага чейин картошка импорттоп, дүйнөдөгү эң ири 20 импортёрдун катарында турат.
Анда эмне үчүн Украина быйыл өзбек картошкасын сатып алууга мажбур болду? Буга пияз күнөөлүү экен. Өтүп бараткан сезондо Украина менен Европа Биримдигинде пияздын жетишпестиги болуп, Борбордук Азия өлкөлөрүнөн: Казакстандан, Өзбекстандан, Кыргызстандан жана Тажикстандан пияз экспортттого жол ачылган. Өзбекстанда картошка түшүмү март айында эле жетилгендиктен, пиязга кошумча арзан баадагы картошка экспорттоо мүмкүнчүлүгү да пайда болгон.
Деген менен, азыркы тапта Украинада картошканын баасы күн сайын төмөндөп баратат.
