Россиянын биринчи-вице-премьери жана каржы министри Антон Силуанов Нефти экспорттоочу өлкөлөрдүн уюмунун (ОПЕК) мүчөлөрүнүн нефти өндүрүү көлөмүн кыскартуу боюнча мүмкүн болуучу бүтүмдөрүнө жана АКШнын сланец нефтисин өндүрүү көлөмүнүн өсүп баратышына кыжаалаттыгын билдирди. Анын айтымында, ОПЕКтин нефть өндүрүү көлөмүн кыскартуу бүтүмү америкалык нефть өндүрүүчү компаниялардын жаңы рынокторду ээлешине сонун шарт түзүп берет. Бул тууралуу Reuters агенттиги билдирди.
Антон Силуанов нефтиге болгон баалардын туруктуулугу жана ишенимдүүлүгү маанилүү экенин белгилейт, бирок ОПЕКтин бул аракеттери америкалыктардын сланец нефтисин өндүрүшүн күчөтүп, кошумча рынокту ээлеп алышына жол ачарын айтат. Ошондуктан, дейт ал, ОПЕК ар кандай тобокелдиктерди жана америкалыктардын нефть өндүрүүнү күчөтүү жагынан мүмкүчүлүктөрүн тыкан карап чыгышы зарыл.
Акыркы жолу ОПЕК+ өлкөлөрү (буга ОПЕКтин мүчөлөрүнөн башка да картелге кирбеген өлкөлөр, мисалы Россия кирет) 2018-жылдын декабрында өз ара бүтүмгө келишкен. Анда өлкөлөр нефть өндүрүүнү кайра дагы азайтып, нефтинин баасынын төмөндөшүн кармап туруу аракетин жасашкан. Суткасына 11,4 миллион баррел нефть өндүрүү каралып, Россия суткасына өндүрүүчү нефтинин көлөмүн 228 миң баррелге азайтууга милдеттенген.