Россия Федарациясынын Томск областында жашап, иштеген мигранттардан куралган волейбол боюнча “Манас KG” курама командасы Сибирь аймагынын чепиону аталышты. Бул тууралу команданын капитаны Элдияр Сулайманов билдирди.
Анын айтымында, “Манас KG” курама командасы мындан он жыл мурда түзүлгөн. Андан бери бир топ ийгиликтерди жаратып келатышат. Алсак, 2018-жылдын жыйынтыгы боюнча бардыгы болуп 18 алтын, 3 күмүш, 2 коло медалга ээ болушту. Быйылкы жылдын башталышынан бери ар кайсы мелдештерде 5 алтын, 1 күмүш, 1 коло медалды багындырышты.
“Манас KG”курама командасынын капитаны Элдияр Сулайманов мындай дейт:
-Адегенде команданы чогултуу бир топ кыйын болду. Анткени бул жакка баарыбыз турмуш-тиричиликтин айынан иштейбиз деп келгенбиз. Бирок, ага карабастан иштен кийин волейбол сүйүүчүлөр өзүбүзчө чогулуп, топ ойноп жүрдүк. Мезгилдин өтүшү менен команда түзүү зарылчылыгы пайда болду. Анан жакшы ойногон балдарды чогултуп, “Манас KG” деген курама команданы түздүм. Бул жакта иштеген бизнесмен агалар көп жардамдарын беришти. Команданын курамында Кыргызстандын ар бир аймагынан оюнчулар бар. Команданын ынтымакчылыгы жана биримдиги менен өзүбүз жашаган областтын төрт жолку чемпиону аталдык.
Маалыматка караганда, кыргыз волейболчулары мындан ары да күчөп, областтык деңгээлден бийик көтөрүлүүгө аракет кылышууда.
