Дүйнө боюнча 2018-жылы орус тилин үйрөнүүчү чет элдиктердин саны эки эсе кыскарып кеткен. Бул тууралуу Россиянын Билим берүү жана илим министрлигинин алдындагы Социологиялык изилдөөлөр борборунун докладында айтылганын РБК жазып чыкты. Анда айтылгандай, орус тилине болгон кызыгуу барган сайын азайып бара жатат.
Алынган маалыматтарга караганда, азыркы кезде дүйнөгө таралышы боюнча орус тили 10-орунда турат да, аны 27 мамлекетте үйрөнүп жатышат. Эгер 1990-жылдардын башында дүйнөдөгү 74,6 миллион киши орус тилин үйрөнгөн болсо, 2018-жылы анын саны араң гана 38,2 миллионго жеткен. Мурдагы СССРдин өлкөлөрүн эске албаганда орус тилин үйрөнгөндөрдүн саны дүйнө боюнча 20 миллиондон 1 миллионго түшүп кеткен. Айрыкча бул Чыгыш Европада жана Балкан өлкөлөрүндө байкалат. Ал жакта 1990-жылы 38 миллион киши орус тилин окуса, 2015-жылы анын саны 8 миллионго азайып кеткен.
Мурдагы СССРдин өлкөлөрүндө да орус тилинде сүйлөөчүлөр саны кескин азайган, тактап айтканда, 119,5 миллиондон 82,5 миллионго кыскарган. Бирок, орус тилинде сүйлөгөндөр саны АКШда, Канадада, Австралияда жана Жаңы Зеландияда 1,2 миллиондон 4 миллионго көбөйгөн. Бул Россиядан жана мурдагы СССРдин өлкөлөрүнөн эмиграцияган кеткендердин балдарынын эсебинен болуп жатканы айтылат. Эксперттер 2025-жылы дүйнө калкы 8 миллиард болсо, алардын 2,7 пайызы же 215 миллиону орус тилинде сүйлөшөрүн болжолдошот.
