Эгер Россиядагы таштандылардын көлөмү азыркыдай темп менен көбөйүп отурса, анда дагы алты жылдан соң турмуш-тиричиликтен чыккан таштандыларды алып чыгаарга жай калбай калат. Бул тууралуу Россиянын Эсеп палатасы “Экология” улуттук долбооруна жасаган мониторингдин жыйынтыгында билдиргенин РИА Новости жазып чыкты.
Аудиторлордун баамында, коммуналдык таштандылардын көлөмү тездик менен өсүп бараткандыктан дагы алты жылдан кийин аларды жайгаштыруу үчүн полигондун табылышы көйгөйлүү болуп калат, ал эми айрым аймактарда мындай абал ага чейин бат эле пайда болушу мүмкүн. Атап айтканда, Камчатск, Приморск, Алтай аймактарында, Чукотск автономиялык областында, Мордовия Республикасында, Ленинград жана Москва областтарында таштанды полигондору жакынкы мезгилдерде эле калдыктарга толуп бүтөт. Ошондуктан бул жагдайды болтурбоо үчүн алдын алуу зарыл.
Деген менен, экологдор Россиядагы негизги көйгөй таштанды эмес, пайдалуу кендерди иштетүүдөн кийинки келип чыгуучу калдыктар экенин айтып жатышат. Эсеп палатасы мындай жыйынтыктарды экологиялык коопсуздук боюнча улуттук стратегиянын маалыматтарына таянып чыгарууда. Андагы маалыматтарга караганда, Россияда жыл сайын 4 миллиард тонна өндүрүш жана керектөө калдыктары пайда болуп жатса, анын ичинен 55-60 миллион тоннасы коммуналдык калдыктар эсептелет.
Кептин баары таштандылар менен калдыктардын экинчи жолу кайра иштетилбей жатышында экен. Аргасыздан үлкөн көлөмдөгү калдыктар менен таштандылар өлкө аймагындагы 4 миллион гектарды ээлген 15 миңдей полигондорго төгүлөт. Ал эми полигондордун аянты жыл сайын 300-400 миң гектарга кеңейүүдө.
