Ноокен райондук эмгек жана социалдык өнүгүү башкармалыгынын үй-бүлөнү башкаруу жана балдарды коргоо бөлүмүнүн жетекчиси Ш. Молдокеримовага аткарып жаткан ишиндеги кемчиликтери, каттоо журналдарын толтурбагандыгы, өз ишине кайдигер мамиле жасандыгы үчүн сөгүш берилди.
Ошондой эле ишинде кемчиликтерге жол бергендиги үчүн райондук мамлекеттик администрациянын башчысынын орун басары, балдар иштери боюнча комиссиянын төрайымы З. Адышевага, райондук эмгек жана социалдык өнүгүү башкармалыгынын башчысы М. Калмамтовго, ошол эле башкармалыктын үй-бүлөнү жана балдарды колдоо бөлүмүнүн башчысы Т. Дубанакуловага эскертүү берилип, мындан ары ишти жакшыртуу жагы талап кылынган. Бул тууралуу КР Акыйкатчысынын Жалал-Абад областындагы өкүлчүлүгүнөн билдиришти.
Эскерте кетсек, КР Акыйкатчысынын Жалал-Абад областындагы өкүлчүлүгү райондордо үй-бүлөнү жана балдарды коргоо боюнча аткарылып жаткан иштерге мониторинг жүргүзүп, Ноокен жана Базар-Коргон райондорунда бир катар кемчиликтер бар экенин аныктаган. Анын негизинде Акыйкатчынын өкүлчүлүгү КР Өкмөтүнүн областтагы ыйгарым укуктуу өкүлүнө көңүл буруу актысын жиберген. Областтык өкүлдүн аппараты көңүл буруу актысын райондор жетекчилерине жиберип, тийиштүү чиновниктердин жоопкерчилигин кароону, бул багытта ишти жакшыртууну талап кылган.
КР Акыйкатчысынын областтагы өкүлчүлүгү бул багытта башка бардык аймактардагы болуп жаткан иштерге мониторинг жасоону улантмакчы.