Жалал-Абадда областык өнүктүрүү фондунан тышкары райондордон бир гана Ноокен районунда өнүктүрүү фонду иштеп жатат. Ага түшкөн каражаттардын максаттуу пайдаланышы тууралуу район акими Эркин Маматев маалымат берди.
-Ноокен райондук өнүктүрүү фонду 2017-жылдан баштап ишке киришкен, ага 2018-жылы 77 миллион сомдон ашык акча түшкөн. Ал эми 2019-жылдын 6 айында 41 миллион сомдон ашык акча түштү. Эки жылда жалпы 21 долбоор каралган. Райондук мамлекеттик администрация түзгөн байкоочу кеңеш тарабынан айыл жерлериндеги эң зарыл болгон долбоорлор тандалып алынып, каражаттар бөлүнүп берилген. Ошол 21 долбоордун ичинде спорттук аянтча, мектеп, бала бакча, жолдорду асфалттоо иштери, электр энергиясын жеткирүү иштери бар. Алардын сегизинин курулуш гана калды, калган 13 объект пайдаланууга берилди. Мисалга алсак, жакынкы күндөрү 3 бала бакча пайдаланууга берилет. Убагында мектеп курулуп, бирок спорттук залы курулбай калган мектептерге спорттук зал курулду. Мындан сырткары, республикалык бюджеттен каржыланып жана демөөрчүлөрдү тартуу жолу менен да бир топ курулуш иштери жүрүп жатат, — дейт аким Эркин Маматаев.
Эске сала кетсек, Ноокен райондук өнүктүрүү фонду өкмөттүн токтому менен ачылган. Райондо жайгашкан “Кыргызнефтегаз” ААКтын сатуудан түшкөн пайдасынын 2 пайызы менен каражат топтолот. Ал эми Ноокен районунда 8 айыл өкмөтү жана Кочкор-Ата шаары бар.
