Өзбекстандын Фергана областында Кытай компаниясы өзбек улуттук “Тулпор” бренди менен тракторлорду өндүрүп чыгарууну жолго коймокчу. Бул биргелешкен долбоордун жалпы наркы 100 миллион долларды чапчыйт. Бул тууралуу Рodrobno.uz жаңылыктар агенттиги маалымат таркатты.
Долбоорду ишке ашыруу боюнча сүйлөшүүлөр областтын жетекчиси Хайрулло менен кытйлык инвестор Юань Яньпиндин ортосунда жүрүп, өз ара кызматташуулар боюнча маселелер каралды. Алынган маалыматка караганда, трактор иштеп чыгаруу боюнча долбоор эки этапта жүрөт жана ал областтын аймагынан орун алган Кувасай шаарынын өнөр жай зонасында жайгашат. Быйылкы жылдын аягына чейин “Тулпор” бренди менен тракторлордун бир нече модели чыгарылат.
Бул өндүрүштүн энергетикалык чыгымдарын оптималдаштыруу максатында ишкананын чатырларына эки мегаватт кубатуулуктагы ток өндүрүүчү күн панелдери орнотулуп, ишкана электр тогу менен өз алдынча камсыз болот.
Эми биринчи этапта трактор иштеп чыгаруучу заводдун курулушу ишке ашырылат да, кийин – комплектилөөчү өндүрүш менен техникалык сервис ишке кирет. Ал эми өндүрүштүк натыйжалуулугун арттыруу жана сапатын жогорулатуу максатында smart-технологияны өздөштүрүү колго алынат.
Чыгарылган тракторлор жергиликтүү жана чет элдик сатып алуучуларга сунуш кылынамакчы. Ошондой эле алгачкы этапта 250 жумушчу орунун түзүү каралган.
