Өлкөнү нефть менен камсыз кылуунун альтернативдүү жолун издеген Белорусия Саудия Арабстанынан чийки зат сатып ала баштады. Биринчи кезектеги импорттук 80 миң тонналык чийки нефть ташыган танкер Литванын Клайпеда шаарынын портуна быйыл 11-майда жетип келмекчи. Бул тууралуу БЕЛТА маалымат агенттиги жазып чыкты.
Буга чейин Белорусия өзүнүн кара майга болгон муктаждыгы үчүн нефтини Россиядан сатып алып келген. Бирок, акыркы кездерде нефтинин баасы боюнча жүргөн өз ара пикир келшпестиктен улам Белорусия сырттан альтернативдүү нефти булагын издеди. Президент Александр Лукашенко нефтини дүйнөлүк баадан да жогору сатып жатканы үчүн Россияны айыптаган. Бирок, дүйнөлүк нефтиге болгон баа арзандап кеткенден кийин эки өлкө өз ара мунасага келип, сатуу-алуу мамилеси кайра жанданган. Ошентсе да нефтинин баасы өз ара канчага макулдашылганы тууралуу ачык маалымат жок.
Айрым булактар Белорусия менен Польшанын ортосундагы нефти сатып алуу келишими тууралуу кабар беришүүдө. Аларга ишенсек, жыл аягына чейин Польша 100 миң тонна нефти жөнөтмөкчү. Ал эми Польша Россиянын нефтисинен баш тартып, Сауддар менен нефти импорттоо боюнча келишим түзгөн.
