Быйылкы январь-октябрь айларынын жыйынтыгы менен Жалал-Абад областында салыштырма баалар менен алганда өнөр жай продукциясынын физикалык көлөмүнүн индекси 105,3 пайзды, айыл чарбасынын өсүү темпи 102,3 пайызды, негизги капиталга инвестицияларды тартуу 105 пайызды, автотранспорт менен жүк ташуу 105,9 пайызды, жүргүнчүлөрдү ташуу 106,6 пайызды, рыноктук кызматтардын көлөмү 103,9 пайызды, чекене товар жүгүртүү 103,5 пайызды, акылуу кызмат көрсөтүү 105,6 пайызды түздү. Бул тууралуу Кыргыз Республикасынын Экономика министрлигинин аймактар аралык башкармалыгынын Жалал-Абад регионалдык бөлүмүнөн билдиришти.
Област боюнча 22 миллиард 895,2 миллион сомдук өнөр жай продукциясы өндүрүлдү. Бул жалпы республиканын көлөмүндөгү областтын үлүшү 10,2 пайызга барабар болду дегенди билдирет. Бирок, өнөр жайынын негизги 4 тармагынын ичинен 1 тармагында өткөн жылга салыштырмалуу физикалык көлөмдүн аткарылышы камсыз кылынган жок.
Мисалы, электр энергиясы, газ, буу, кондицияланган аба менен камсыздоо тармагында аткарылган иштердин көлөмү 97,2 пайызды түзүп, анын ичинен электр энергиясын өндүрүү 96,7 пайызга, электр энергияны кайра бөлүштүрүү 97,1 пайызга жана газды өндүрүү, кайра бөлүштүрүү 98,7 пайызга гана аткарылган.
