Эми Өзбекстандын мыйзамдарында “мекендеш” түшүнүгү пайда болот жана өлкөнүн жарандыгын алуу кыйла жеңилдетилет. Бул тууралуу Podrobno.uz жаңылыктар агенттиги кабарлады.
Бул жаңы өлкөнүн парламентинин төмөнкү палатасынын үчүнчү окуусунда кабыл алынган “Өзбекстан Республикасынын жарандыгы жөнүндө” жаңы редакциядагы мыйзам долбоорунда каралган. Бул мыйзам долбоорун эми парламенттин жогорку палатасы – сенат карап чыгат.
Аталган документте өлкөнүн жарандыгын алгысы келген мекендештерди жеңилдетилген тартипте кабыл алуу чаралары белгиленген. Ошондой эле ведомстволор аралык электрондук өз ара аракеттенишүү механизмдерин түзүү аркылуу жарандык боюнча түшкөн арыздарды кароонун жеңилтетилген нормаларын иштеп чыгуу жагы да көздө тутулган. Эгер мыйзам кабыл алынса, жарандык алуу жагынан талап кылынуучу документтер азайып, жарандарды консулдук эсепке коюу мөөнөтү узармакчы.
Эске сала кетсек, өлкөгө 1995-жылга чейин келип, туруктуу жашаганына карабастан жарандык ала элек атуулдар саны 50 миң кишиге барабар. Бул көйгөй тууралуу өлкө президенти парламентке болгон кайрылуусунда белгилеп кеткен эле.
Ал эми Өзбекстандын калкынын саны 34 миллионго жеткени тууралуу жакында эле кабар таркады.
