Өткөн аптада Ош шаарындагы “Классик” мейманканасынын залында биринчи жолу шаар мэринин кубогуна жаш балдар жана чоңдор арасында шахмат боюнча мелдештер өтүп, анда Жалал-Абаддан барган эки жаш шахматчы 1-орундарды камсыз кылышты. Бул тууралуу жаш шахматчылардын машыктыруучусу, шахмат боюнча СССР спортунун мастери Абабакир Алайев билдирди.
Бул мелдешке Бишкек жана Ош шаарынан, андан тышкары Кыргызстандын бардык областтарынан 150 жаш шахматчылар келип катышкан. Мелдештер катышуучулардын жаш өзгөчөлүгүнө карап 10 жашка чейин, 14 жашка чейин жана 14 жаштан жогору деп, 6 топко бөлүнүп өткөрүлгөн.
Бул мелдешке катышуу үчүн барган Жалал-Абаддык Жакыпова Нурайым 10 жашка чейинки кыздар арасында, ал эми Курумбеков Марат 10 жашка чейинки балдар арасында 1-орунду жеңип алышты.
-Биздин балдарыбыз абдан сонун ойношту, бардык атаандаштарын жеңип алышты. Албетте, буга чейин деле республикалык мелдештерге катышып, алдыңкы орундарды камсыз кылып келе жатышат. Ал эми Ош шаарынын мэриясы бул мелдешти аябай сонун уюштуруптур, түзүлгөн шарттары, уюштурулушу мыкты. Эми ушундай мелдештер бат-бат өтүп турса, балдарыбыздын келечегине жакшы болмок, — дейт машыктыруучу А. Алайев.
Мэрдин кубогуна арналган бул мелдештерди жыйынтыктоого Ош шаарынын вице-мэри Жасур Азимов катышып, жеңүүчүлөргө кубокторду, медалдарды жана баалуу белектерди тапшырды.
