Быйыл июнь айынан баштап Өзбекстан Республикасындагы жеке менчик балдар бакчаларына балдарды бир жашынан тартып кабыл алууга уруксат берилет. Бул тууралуу Ташкент шаарынын акимчилигинин басма сөз кызматына шилтеме берүү менен Podrobno.uz жаңылыктар агенттиги жазып чыкты.
Мындай мүмкүнчүлүк өлкө президенти Шавкат Мирзиёев 2019-жылдын 16-декабрында кол койгон “Мектепке чейинки билим жана тарбия берүү жөнүндө” мыйзамына ылайык түзүлдү. Ал эми Мектепке чейинки билим берүү министрлигинин басма сөз кызматынын билдиришинче, бул норма жеке менчик балдар бакчаларына гана берилүүчү мүмкүнчүлүк. Буга чейин мындай балдар бакчалары балдарды 2 жашынан баштап кабыл алып келишкен, ал эми кабыл алынган мыйзам күчүнө кирген 2020-жылдын 16-июнунун тартып 1 жаштан кабыл алууга укуктуу болушат. Аталган мыйзамда мамлекеттик балдар бакчалары балдарды 3 жашынан тартып кабыл алышы керектиги көрсөтүлгөн.
Мыйзам боюнча балдар бакчаларына балдарды кабыл алуу төмөнкү тайпалар боюнча жүрөт:
-баштапкы өнүгүү тайпасы (бир жаштан үч жашка чейин);
-кичи тайпа (үч жаштан төрт жашка чейин);
-ортоңку тайпа (төрт жаштан беш жака чейин);
-улуу тайпа (беш жаштан алты жашка чейин);
-мектепке чейинки даярдык тайпасы (алты жаштан жети жашка чейин).
