Өткөн 2023-жылы Молдованын багбандары Европа Шериктештигинин рыногуна кайналынын экспортун көбөйтүп, жыйынтыгында бир эле кайналынын өзүнөн 35 миллион доллар киреше табышты. Бул тууралуу Молдова Республикасынын вице-премьер-министри Думитру Алайба билдиргенин МОЛДПРЕС басылмасы жазып чыкты.
Алынган маалыматка караганда, Европа Шериктештигинин аймагына кайналынын экспорту негизинен Молдовадан жүргүзүлөт. Өткөн жылы европалыктар жеген кайналынын 25 пайызы молдовалыктардыкы болгон. Ошентип, өлкөнүн айыл чарба продукциясын өндүрүчүлөр жакшы киреше таап жатышат.
Д. Алайбанын айтымында, Европа Шериктештиги эки жыл мурун Молдовадан өндүрүлгөн айыл чарба товарларынын жетөөсүнө импорттук квота киргизген болчу, эми ал алынып салынды.
-Биздин айыл чарба өндүрүшчүлөрбүз, ишкерлерибиз жакшы аракеттерди жасап атышат. Ошонун натыйжасында өткөн жылы 60 миң тонна кайналы өндүрүлүп, кайра иштетилген. Бул эки жыл мурдагы квотада көрсөтүлгөн 15 миң тоннадан төрт эсе көптүк кылат. Ошентип, айыл чарба өндүрүшчүлөрүбүздүн аракети төрт эсе жемиштүү болду жана андан ары да өнүгүүгө жол ачты, — дейт виве-премьер-министр.
Эскерте кетсек, Молдованын негизги соода өнөгү Европа Шериктештиги болуп саналат.
Тактама: Молдова Республикасы Европанын түштүк-чыгышынан орун алып, Украина жана Румыния менен чектешет. Унитардык мамлекет, 2022-жылдын 1-январына карата калкынын саны 2 миллион 603 миң 813 киши деп айтылат (дүйнөдө 132-орунда). Ички дүң продукциясынын номиналдык көлөмү 11,5 миллиард долларга барабар, жан башына 4370 доллардан туура келет.
Булак: east-fruit.com
