Жер шарынын калкы тездик менен улгайып баратат, ал эми балдардын саны улам кыскарууда. Бириккен Улуттар Уюмунун (БУУ) маалыматтарына караганда, азыр Жер шарындагы карылардын саны балдардын санына караганда көп болуп калды.
БУУнун демографтары билдиргендей, 2018-жылдын акырына карата тарыхта биринчи жолу карылар саны балдар санынан ашып түштү. Алсак, дүйнөдөгү 65 жаштан өйдө кишилер саны азыр 705 миллион болсо, беш жашка чейинки балдардын саны 650 миллион.
Ошондой эле, БУУнун маалыматында улгайган кишилердин санынын көбөйүшү негизинен өнүккөн өлкөлөрдүн калкына мүнөздүү нерсе. Себеби ал жактарда адам өмүрүнүн узактыгы артып, балдардын төрөлүшү удам азайып баратат. Өнүккөн өлкөлөрдө бала төрөөдөн баш тартуу тенденциясы токтой элек.
Вашингтон университетинин саламаттыкты коргоонун абалын баалоо институтунун окумуштуулары 1960-жылы өнүккөн өлкөдө жашаган бир аялга дээрлик 5 бала туура келсе, 2018-жылга карата бир аялга 2,4 бала туура келгенин айтышат. Ошол эле кезде ал жакта өмүрдүн узактыгы 52ден 72ге чейин өскөнүн белгилешүүдө.
Демографтар мындай тенденцияны адамзат келечеги үчүн коркунучтуу деп эсептешеп жатышат. Мындан улам Жер шарындагы өлкөлөрдө пенсиялык камсыздандырууга жана саламаттыкты сактоо тармагына оорчулуктар келип түшөт, ошол эле кезде экономикалык өсүү жайлайт. Бир катар өлкөлөрдө калктын саны жакынкы он жылдарда эле азайып кетиши күтүлөт.
