Базар-Коргон районунун реалдуу секторунун бардык тармактары боюнча быйылкы жарым жыл ичинде салыштырма баада 4 миллиард 511 миллион 80 миң 200 сомдук дүң продукция өндүрүлүп, өндүрүштүн көлөмү өткөн жылдын биринчи жарымындагы деңгээлине салыштырмалуу 112,5 пайызга, ал эми 2021-жылдын божомол планында белгиленгенге карата 112 пайызга өстү. Бул тууралуу райондук мамлекеттик администрациясынын алты айлык жыйынтыкты караган жыйынында айтылды.
Алынган маалымат боюнча, жалпы ички дүң продукциянын көлөмүнүн 51 пайызы айыл чарба тармагына, 28,2 пайызы чекене товар жүгүртүүгө, 11,2 пайызы капиталдык салымдарды өздөштүрүүгө, 4,8 пайызы өнөр жай тармагына жана 4,8 пайызы акылуу кызмат көрсөтүүгө туура келди.
Райондун өнөр жай тармагында да өткөн жылга салыштырмалуу өсүш белгиленди. Атап айтканда, салыштырма бааларда 217 миллион 386 миң 100 сомдук продукция өндүрүлүп, анын көлөмү өткөн жылдын жарым жылдык деңгээлине карата 24 миллион 595 миң 400 сомго же 112,8 пайызга көбөйгөн. Ошондой эле, 2021-жылдын божомол планына карата 23 миллион 519 миң 500 сомго көп аткарылып, өсүш 112,1 пайызды түзгөн. Андан сырткары, өндүрүлгөн өнөр жай продукцияларынын физикалык көлөмү 107,1 пайызга жетти.
