Базар-Коргон районунда негизги болуп эсептелген айыл чарба тармагында быйылкы жарым жылдыкта өткөн 2020-жылдын биринчи жарым жылына салыштырмалуу 7 миллион 944 миң 800 сомдук продукция көп өндүрүлдү. Бул тууралуу райондук мамлекеттик администрациянын расмий маалыматтарында айтылат.
Башкача айтканда, быйыл жарым был ичинде салыштырма баалар менен алганда өндүрүштүн көлөмү 2 миллиард 298 миллион 397 миң 300 сомду түзүп, анын көлөмү 2020-жылдын биринчи жарым жылына карата көлөмүнө салыштырмалуу 100,3 пайызга өстү. Анын ичинен 819 миллион 162 миң 900 сомдук өнүм талаачылык продукциялары, 1 миллиард 479 миллион 234 миң 400 сомдук өнүм мал чарба продукциялары болуп саналат.
Деген менен, райондогу айрым аймактарда айыл чарба продукцияларын өндүрүү көлөмү азайып кеткен. Мисалы, өткөн 2020-жылдын ушул мезгилине салыштырмалуу Акман айыл өкмөтү быйылкы жарым жылда өндүрүш көлөмүн 95,4 пайызга араң жеткирип, 8 миллион 936 миң 400 сомго азайтып жиберген. Ал эми Кеңеш айыл өкмөтү өткөн жылдын биринчи жарымына карата 81,3 пайызга араң жеткирип, 69 миллион 477 миң 200 сомго кем өндүргөн.
Эске сала кетсек, быйылкы жарым жылдагы райондун айыл чарбасында өндүрүлгөн жалпы ички дүң продукциянын көлөмүнүн 51 пайызы айыл чарба тармагына туура келди.
