Алмазбек Атамбаев ажолуктан кеткенден кийин бөлүнүп-жарылып, эки жээктен орун алып калган КСДПнын атамбаевдик бөлүгүнө Социалисттик интернационал жардамга келери анык болду. Бул тууралуу аталган партиянын басма сөз кызматына шилтеме берип, кыргызстандык сайттар жазып чыгышты.
Аталган партияга жиберген катта Социнтерн өз өкүлдөрүн Кыргызстанга жибере турганын, түзүлгөн жагдайды жеринде карап чыгаарын билдирген.
Буга чейин белгилүү болгондой, КСДП мурда бийликтин партиясы болуп турган, кийин партиянын ичинен жик пайда болуп, А. Атамбаевге каршы позицидагы партия мүчөлөрү партияны Юстиция министрлигинен кайра каттатып алышкан.
Ал эми Социалисттик интернационал эл аралык бейөкмөт уюму катары белгилүү, анын курамында дүйнө боюнча 140 социалисттик жана социал-демократиялык партиялар бар. Кыргызстанда социалисттик багыттагы эки – “Ата-Мекен” жана КСДП партиясы белгилүү.