Өзбекстанда мал чарбачылыгын өнүктүрүүнүн беш жылдык долбоору башталды, аны Европа биримдиги жана дүйнөлүк банк каржыламак болду. Бул тууралуу Podrobno.uz жаңылыктар агенттиги жазып чыкты.
Бул долбоорго Европа биримдиги 15 миллион евро, ал эми Дүйнөлүк банк 150 миллион доллар бөлүп берет. Долбоордун максаты мал чарбачылыгындагы төмөнкү өндүрүмдүүлүлүктү, кошумча нарктын жетишсиздиги, каржы булактарынын жана рыноктун тартыштыгы, кызыкдар тараптар менен иштешүүнү координациялоо болуп саналат.
Азыркы тапта Өзбекстандагы мал чарбачылыгынан алынуучу продукциянын 90 пайызын майда фермердик чарбалар беришет. Ал чарбаларда продукциянын өнүмү аз, рынокто ийгиликтүү иштей алышпайт, маркетинг системасы өнүкпөгөн. Ал эми алардын колунда болгону 15 пайыз гана айдоого жарактуу жерлери бар.
Азыр фермерлердин колунда кара малдын 94 пайызы, үй канаттууларынын 63 пайызы турат. Көпчүлүк фермердик чарбалар өздөрүнүн керектөөлөрүнөн ашыкча продукция чыгарууга жөндөмдүү эмес, эмгек өндүрүмдүүлүгү начар. Өлкөдөгү 4,7 миллион майда чарбалар жан багуу менен гана алек.
Эми аталган долбоордун алкагында комерциялык чынжырда аракет кылуучу фермердик чаралардын саны өсүп, өндүрүмдүүлүк артышы зарыл жана туруктуу кирешеге жетишүү керек. Ал эми Дүйнөлүк банк биринчи кезекте ветеринардык кызматтарды колдоого алып, айланма капиталды, инвестицияларды камсыз кылмакчы.