COVID-19 пандемиясынын айынан быйылкы жылдын аягына чейин дүйнөнүн ар кайсы аймактарында жакырчылыктын азабын тартып жаткан балдардын саны 86 миллионго же 15 пайызга өсүшү мүмкүн. Мындай божомол Бириккен Улуттар Уюмунун Балдар фондусу (ЮНИСЕФ) жана “Балдарды коргойбуз” эл аралык альянсы жарыялаган жаңы изилдөөлөрдө айтылат.
Изилдөөнүн авторлору эгер шашылыш чаралар көрүлбөсө, анда кирешеси төмөн жана орто өлкөлөрдө жашап, жакырчылыктын запкысын тартып жаткан балдардын саны жыл аягына чейин 672 миллионду түзүшү ыктымал экенин эскертишет. Европанын жана Борбордук Азиянын өлкөлөрүндө мындай кейиштүү көрсөткүч 44 пайызга жетиши мүмкүн.
Эксперттер жакырчылыктан жабыр тартып жаткан үй-бүлөлөр эки тараптуу соккуга кабылышат: биринчиден, жумуш ордун жоготуу менен ата-энелер балдарын эң эле зарыл нерселер менен камсыз кыла албай калышат; экинчиден, балдар билим алуу, сапаттык медициналык жардамдан пайдалануу мүмкүндүгүнөн ажырашат деп эскертишүүдө. Ошол эле кезде балдардын эмгегин эксплуатациялоо, зордук-зомбулук жана эрте никеге туруу көрүнүштөрү көбөйүп кетет.