Азык-түлүк коопсуздугун камсыз кылуу жана айыл чарба аянттарын натыйжалуу пайдалануу максатында област боюнча айыл чарба иштери активдүү жүрүп жатканын КР өкмөтүнүн Жалал-Абад областындагы ыйгарым укуктуу өкүлүнүн аппаратынын бөлүм башчысы Ажимамат Исаев билдирди.
Анын айтымына караганда, бир катар дан эгиндерин айдап-себүү иши пландагыдан көбүрөөк жүргүзүлдү. Атап айтканда, быйылкы жылдын 4-майына карата жаздык буудай эгүү 111 пайызга, арпа эгүү 108 пайызга аткарылды. Ошол эле кезде дандык жүгөрү эгүү 81 пайызга аткарылып, учурда аны аяктоо иштери жүрүп жатат. Област боюнча 11 миң 6 гектарга эгилген кылкандуу дан эгиндерин кошумча азыктандыруу иши толук жүзөгө ашырылды.
-Областтын дыйкандары убакытты текке кетиришкен жок, айыл чарба иштеринин темпи жаман эмес. Дан эгиндеринен башка да картошка эгүү 4-майга карата 74 пайыз, май өсүмдүктөрүн эгүү 95 пайыз, чанактуу өсүмдүктөрдү эгүү 79 пайыз, күрүч эгүү 38 пайыз аткарылды. Азыркы тапта бул багытта иштер кызуу. Анан дагы үрөн менен камсыз кылуу жакшы колго алынып, дыйкандар буудай, арпа, картошка, май, күрүч, бахча өсүмдүктөрүнүн үрөнү менен 100 пайыз камсыз болушту. Пахта үрөнү менен камсыз кылуу 95 пайызды түздү. Буюрса, быйыл жакшы түшүм алууга негиз түзүлүп калды, — дейт А. Исаев.
