Өлкөдө орун алган өзгөчө кырдаал жана карантиндик иш-чараларга карабастан Жалал-Абад областынын дыйкандары быйыл жаздык буудайды жылдагыдан көп себүүгө үлгүрүштү. Ошол эле кезде айыл чарба техникаларын даярдоо боюнча тынымсыз аракет жүрүүдө. Бул тууралуу КР өкмөтүнүн Жалал-Абад областындагы ыйгарым укуктуу өкүлүнүн аппаратынын бөлүм башчысы Ажимамат Исаев билдирди.
Анын айтымында, быйылкы 4-майга карата алынган маалыматтар боюнча 700 гектар аянтка жаздык буудай көп себилген. Эгер салыштыра келсек, 2019-жылы областта күздүк буудай 12 миң 410 гектарга, жаздык буудай 4464 гектарга, баары болуп 16 миң 874 гектарга буудай себилген болчу. Быйылкы түшүм үчүн 10 миң 645 гектарга күздүк буудай, 7047 гектарга жаздык буудай себилип, жалпы аянты 17 миң 692 гектарга жетти. Бул 2019-жылга салыштырмалуу 818 гектарга көптүк кылат.
-Айыл чарба иштеринин натыйжалуулугу техникадан көбүрөөк көз каранды. Ошондуктан жер-жерлерде тракторлордун техникалык даярдыгы 84, малалар 97, культиваторлор 94, үрөн-сепкич техникалардын даярдыгы 96 пайызды түздү. Ал эми жер семирткичтерди чачуучу техникалардын даярдыгы 100 пайыз болду. Карантин убагында айыл чарба техникаларынын коюлган блок-посттордон талаадан-талаага эркин өтүшү камсыз кылынды, — дейт А. Исаев.
