Кыргыз Республикасынын өкмөтүнүн Жалал-Абад областы боюнча ыйгарым укуктуу өкүлүнүн аппараты 7-апрелде белгиленүүчү Элдик революциясына эскерүүгө карата 22 пункттан турган иш-чаралардын планын бекиткен жана областын бардык район-шаарларына жиберилген. Бул тууралуу өкүлдүн аппаратынан билдиришти
-7-апрель жекшемби күнгө туш келгендигине байланыштуу 6-апрель күнү эстеликтерге гүлчамбарлар коюлуп, ыңкылап курмандыктарына арнап куран окулуп, салтанаттуу эскерүү иш-чаралары өтөт. Ага чейин каза болгондордун эстеликтеринин айланасын ирээтке келтирүү үчүн ишембиликтерди уюштуруу, район-шаарлардын борборлоруна Элдик революцияны эскерүү баннерлерин илүү, каза болгондордун үй-бүлөлөрүнө ар тараптуу жардам көрсөтүү, окуу-жайларда илимий-практикалык конференцияларды, семинарларды, лекцияларды уюштуруу тапшырылган. Андан сырткары, спорт комитеттери тарабынан спорттук мелдештер өткөрүлөт. Жалал-Абад шаарындагы Эркиндик аянтындагы эскерүү митингде көзү өткөндөр үчүн мемориалдык тактайчасы уюштурулат, – деди өкүлдүн аппаратынын социалдык өнүктүрүү жана мониторинг бөлүмүнүн башчысы Гүлзат Аширова.
Эске сала кетсек, 90 адамдын өмүрүн алган Апрель революциясынын болгонуна быйыл 9 жылдын жүзү болот. Ал эми 2010-жылы 7-апрелде Жалал-Абад областынын 7 жараны Ак үй алдында окко учса, кийин 2 адам областтык администрациянын алдында каза тапкан. Ал эми жаракат алгандардын саны 67ге жеткен. Област боюнча жалпы 110 Апрель баатырлары бар.
