Түштүк Африка Республикасынын (ТАР) парламентинин төмөнкү палатасынын онлайн жыйынына хакерлер чабуул жасашып, экранга порнографиялык көрүнүштү коюп салышкан. Бул тууралуу Eyewitness News порталы кабарлаган.
Хакерлер порнографияны жайгаштыруу менен гана чектелбестен Улуттук жыйындын спикери Танди Модис айымдын дарегине расалык мазактоолорду да айтышкан. Жыйын башталбай жатып аягына чыккан, анткени Модис айым аны кийинкиге калтырып, жүз берген көйгөй менен шугулданууну техниктерге тапшырган. Бирок, кылмышкерлер табыла элек.
Eyewitness News порталы билдиргендей, бул ТАРдын өкмөтүнүн онлайн иш-чараларына каршы чабуул койгон биринчи окуя эмес. Өткөн айда аялдар иштери боюнча министрдин башчылыгына өткөн онлайн иш-чара да үзгүлтүккө учураган, себеби хакерлер чабуул коюшуп, экранга порнографиялык көрүнүштү жайгаштырып салышкан.
Онлайн жыйындардагы оңтойсуз көрүнүштөр башка өлкөлөрдө да болуп жатат. Апрель айында Уэльстин саламаттыкты сактоо министри Вон Гетинг онлайн жыйын өткөрүү менен микрофонду өчүрүүнү унутуп калган. Натыйжада анын жыйында отуруп сөгүнгөнү таркап кетип, жыйынга катышып жаткандардын бир тобу оңтойсуздуктан ооздорун колу менен жаап калышса, башкалары ачык эле күлүшкөн.
