Коомдук укук коргоочу, Сузак районунун Дөмөр айылынын тургуну Максатбек Бердикулов өзүнүн ден-соолугуна жана өмүрүнө кооп жаралып жатканын айтып, коопсуздугун коргоо өтүнүчү менен райондун прокуроруна арыз менен кайрылды. Бул тууралуу М. Бердикулов өзү билдирди.
Анын арызда жазып билдиришинче, ал быйылкы 23-майда А.О. аттуу жарандан токмок жеген, оозго алгыс сөздөр менен сөккү уккан. Бул тууралуу райондук ички иштер бөлүмүнө кайрылган, бирок А.О. ушул кезге чейин суракка келбей, милиция кызматкерлери аны таппай жүрүшөт. Ал эми 12-июнь күнү изделип табылбай жаткан А.О. Нематжан Мирзакаюмов аттуу жаранды ур-токмокко алып, эки тишин жана бир бутун сындырган. Жабырланган Н. Мирзакаюмов ооруканага түшкөн. Милиция органдары зөөкүрлүк кылган жаранды кармап, тийиштүү аракеттерди жасай элек.
М. Бердикулов райондун прокурору М. Осмоновдон эч ким көзөмөлдөбөгөн жаран тарабынан ден соолугуна жана өмүрүнө коркунуч барлыгын билдирген жана коргоо чараларын көрүүнү суранган.
