Быйылкы он бир айдын ичинде автомобиль жолдорунун тилкесине жана жээгине мыйзамсыз курулган 86 тейлөө объекттери буздурулган жана алынып салынган. Дагы 78 объект боюнча баштапкы калыбына келтирүү багытында жарандарга эскертмелер берилген. Бул тууралуу КР Айыл чарба министрлигине караштуу Жерди жана сууну көзөмөлдөө боюнча кызматы билдирди.
Алынган маалыматка караганда, жогорудагы айтылгандай мыйзам бузуулар боюнча прокуратура жана сот органдарына 6 материал, ички иштер башкармалыктарына 78 материал өткөрүлүп берилген. Андан сырткары, шаар мэрияларына жана мамлекеттик архитектура-курулуш көзөмөл башкармалыктарына өткөрүлгөн материалдардын саны 34тү түзсө, алардын ичинен 86 объект буздурулуп жана алдырылган. Ошондой эле 78 объект боюнча баштапкы калыбына келтирүү боюнча жарандарга эскертмелер берилди.
КР Айыл чарба министрлигине караштуу Жерди жана сууну көзөмөлдөө боюнча кызматтын таркаткан билдирүүсүнө ылайык, Кыргыз Республикасынын Президентинин 2023-жылдын 14-мартындагы “Автомобиль жолдорунун жээгиндеги жерлерге (жол тилкесиндеги жана жол боюндагы тилкедеги жерлерге) жол боюндагы тейлөө объекттерин (анын ичинде соода объекттерин) мыйзамсыз жайгаштырууну алдын алуу жана бөгөт коюу боюнча чаралар жөнүндө” ПЖ №56 Жарлыгын аткаруунун алкагында Жерди жана сууну көзөмөлдөө боюнча кызмат тарабынан 2023-жылдын 15-декабрына чейин республика боюнча жеринде текшерүүлөрдү жүргүзүүнүн натыйжасында 282 объектиде кемчиликтер жана бузуулар аныкталган. Алардын ичинен мыйзам бузган айыпкерлерге жалпысынан 163 000 сом өлчөмүндө айып пул салынды.
