Таажылуу вирус пандемиясынан кийин Россиянын аймагында массалык маалымат каражаттарынын саны азайып кетиши күтүлөт. Бул тууралуу Россия Федерациясынын Санариптик өнүгүү, байланыш жана массалык коммуникация министринин орун басары Алексей Волинге шилтеме берүү менен ТАСС маалымат таркаткан.
Анын айтымында, таажылуу вирус пандемиясынын кесепетинен өлкө аймагындагы иштеп жаткан массалык маалымат таркатуу каражаттарынын саны 10-15 пайызга кыскарып кетет. Буга жаңы вирустун жайылып кетиши эле негизги себеп болуп калбайт, ансыз да өлкөдөгү гезит, интернет-басылмалар, телеканалдар жана радиостанциялар саны рынок багып кете ала турган өлчөмдөн көбүрөөк.
А. Волин билдиргендей, ММКлар аны кыскарганы менен журналисттер арасындагы келип чыгуучу жумушсуздук деңгээли анча жогору болбойт, себеби аймактык жана федералдык ММКлардын кызматкерлери учурда бир нече редакцияларда иштеп жатышат. Анан калса, кесипкөйлөргө баары бир жумуш табылат.
Буга чейин, аталган министрликтин башчысы Максут Шадаев Россиянын премьер-министри Михаил Мишустинге ММКларды таажылуу вирус пандемиясынан көбүрөөк жабыр тарткан тармактар тизмесине кошуу сунушу менен кат жөнөткөн. Анын пикирин боюнча, пандемия учурунда коомдун маалыматка муктаждыгы канчалык өскөнү менен ММКлардын кирешелери кескин азайып кетүүдө.
