Жалал-Абадда ден соолук жумалыгы башталды жана апта ичинде ден соолук дарыгердин акысыз көзөмөлүнөн өтүү жана спорттук иш-чараларды уюштуруу пландалган.
“Кызыл жарым ай” коому тарабынан бүткүл дүйнөлүк ден соолук күнүн майрамдоо алкагында көз ооруларынын алдын алуу жана диагностикалоо боюнча ар түрдүү иш-чаралар өтүп жатат. Мындай аракеттер аталган коомдун “Кыргызстандын түштүгүндөгү аярлуу жааматтарга офтальмологиялык кызмат көрсөтүүнүн жеткиликтүүлүгүн жана сапатын жакшыртуу” долбоорунун алкагында Швейцария “Кызыл чырымынын” колдоосу менен ишке ашырылууда.
Бул долбоор алкагындагы иш-чаралар алгач Баткен областында башталып, 25-марттан 29-мартка чейин калк арасында көздүн курчтугун аныктоочу таблицалар таркатылган. Көрүүсү бузулуп жаткандыгы аныкталган учурда жакынкы үй-бүлөлүк дарыгер тобуна жөнөтүлүп турган.
Андан соң 1-апрелден тарта Ош областында өтүп, балдар үйлөрүндө, мектептерде, кесиптик лицейлерде окуучулардын көрүүсүн текшерүү иштери жүрдү. Ал эми Жалал-Абад областындагы иш-чаралар 8-апрелден тарта башталып, Кара-Көл, Аксы, Жалал-Абад шаарларында ар түрдүү чаралар пландалган.
“Кызыл жарым ай” коомунун областтагы өкүлчүлүгүнөн кабарлашкандай, Жалал-Абад шаарында эл көп каттоочу жайда калкты дарыгердин көзөмөлүнөн акысыз өткөрүү иштери, спорттук оюндарды уюштуруу каралган.
