Өкмөттүн Жалал-Абад облусу боюнча ыйгарым укуктуу өкүлү Кыянбек Сатыбалдиев Ош шаарында 22-апрель күнү президент Сооронбай Жээнбековдун катышуусунда өткөн жыйында уктап калды деген маалыматка жооп берди.
-Кыянбек Урмаматович, интернет ааламында Президент катышкан жыйында уктап калган жетекчилер тууралуу сүрөттөр тарап, кызуу талкууга алынып жатат. Сүрөттө уктап калгандардын арасында сиз дагы бар экенсиз. Уктап калганыңыз чынбы?
-22-апрель күнү, Ош шаарында мамлекет башчыбыздын катышуусундагы «Санарип Кыргызстан региондорду өнүктүрүү» деп аталган биринчи телекоммуникациялык форумуна катышкам. Форумдун аягына чейин маалыматтарды угуп, жакшынакай эле отурдум. Уктап калуу же үлгүрөп кетүү болгон эмес. Болгону сүрөт тартып жаткан убакта көзүмдү ирмеген үчүн кадрда ошондой чыгып калыптыр. Муну иш-чаранын видео сюжетинен деле көрсөңөр болот.
Булак: kabarlar.org
