Эми Самарканддагы Амир Темирдин анжир багы туристтик маанилүү объектке айландырылат. Баары таажылуу вирус менен алек болуп жатканда Өзбекстан карантинден кийинки өлкөнүн жашоосу үчүн аракет кылууда. Бул тууралуу Podrobno.uz жаңылыктар агентиги жазып чыкты.
Самарканд шаарындагы Амир Темирдин анжир багы жайгашкан Багибаланд маалесин өлкөнүн Туризм боюнча мамлекеттик комитети туристтер көп байырлаган жерге айландырууну чечти. Бул анжир багынын жалпы аянты 40 гектар, Зарафшан суусунун сол жээгиндеги дөңсөөнүн түшө беришинде жайгашкан.
“Бабур-намеде” жазылгандай, бул анжир багы Амир Темир тарабынан сүйүктүү небереси Мироншах Окабегимге арналып негизделген, узак тарыхы бар. Ал эми жергиликтүү тургундар анжир багын өстүрүүнүн башкаларга белгисиз сырларын жакшы өздөштүрүшкөн жана аларды муундан-муунга калтырып келишет. Бактагы анжирлердин айрымдарынын жашы кеминде 200-300 жылга барабар.
Ал эми анжир багы жайгашкан маалени туристтик аймакка айландыруу ниети Туризм боюнча мамлекеттик комитетине, Самарканд областынын туризм департаментине, областтык акимчилигине таандык. Өлкө президентинин туризм жаатындагы атайын жарлыгына ылайык, мындай калктуу конуштарда үй-бүлөлүк конок үйлөрүн, кеминде беш түрдүү кызмат көрсөтүүчү коомдук институттарды жайылтуу жагы каралууда.
Учурда бул долбоорду ишке ашыруу аракеттери башталды. Ошол аймактагы фермердик чарбалар өз ээликтеринде мыкты сорттогу анжирлерди өстүрүп, туристтер жакшы эс алышы үчүн тийиштүү шарттарды камсыз кылышат. Аны үчүн шыйпаңдар, сөрүлөр жасалып, улуттук даамдарды, баалуулуктарды туристтерге ачык абада тартуулашат. Туристтер бышкан анжирлерди өздөрү теришет, аларды багуу сырлары менен таанышышат. Аларга кургатылган анжир, кыямдар берилет. Фольклордук жамааттар туристтерге эстетикалык ырахат тартуулашат.
Ал эми анжир жылына эки жолу – июнда жана сентябрда түшүм бериши эске алынып, туристтерди ошол убакта кабыл алуу жагы каралууда.
