Акыркы он айдын ичинде, башкача айтканда, 2021-жылдын сентябрынан 2022-жылдын июль айына чейин Египет айыл чарба өндүмдөрүн башка өлкөлөргө экспорттоону арттырып, анын жалпы кирешесинин көлөмү 2,47 миллиард долларга жетти. Ал эми 2020-2021-жылдардын ушул мезгилинде экспорттун көлөмү 2,21 миллиард долларды түзгөн эле. Демек, жыл ичинде 11,4 пайыз өсүү болгон. Бул тууралуу Египеттин Айыл чарба өндүмдөрүн экспорттоо кеңеши маалымат таркатканын egyptindependent.com порталы жазып чыкты.
Аталган он ай ичинде 805 миллион долларга 1,622 миллион тонна цитрус жемиштери экспорттолгон. Ал жалпы агроэкспорттун көлөмүнүн 41 пайызын, жалпы сектордун экспорттук наркынын 33 пайызын түзөт.
Жаңы бышкан картошканын экспорту жалпы египеттик агроэкспорттун көлөмүнүн 21 пайызын же 842 миң тоннаны түзүп, 355 миллион доллар киреше берди. Бул жалпы сектордун экспорттук наркынын 14 пайызын түзөт.
Араб өлкөлөрүнө 879 миллион доллар көлөмдө агроэкспорт жасап, ал жалпы экспорттун 42 пайызын, жалпы экспорттук нарктын 36 пайызын түзгөн. Европа Биримдигинен тышкары өлкөлөргө 1,061 тонна агроөндүмдөр экспорттолгон, анын жалпы наркы 655 миллион долларга жеткен. Бул жалпы экспорттун жана жалпы экспорттук нарктын 27 пайызына барабар. Ал эми Европа Биримдигине 566 миллион доллар көлөмүндөгү 726 миң тонна агроөндүмдү экспорттогон. Жалпы экспорттун 18 пайызын, жалпы экспорттук нарктын 23 пайызын түздү.
Андан башка да Россияга 405 миллион доллар, Саудия Арабстанына 285 миллион доллар, Азия өлкөлөрүнө 299 миллион доллар көлөмүндө агроэкспорт жасаган. Ал эми Америка менен Австралияга жөнөткөн экспортунун көлөмү 38 миллион долларды түзөт.
