ЖАЛАЛ-АБАД: 67 МИЛЛИОН СОМ ТАЛААДА КАЛДЫ
Өткөн жылды Президент Сооронбай Жээнбеков аймактарды өнүктүрүү жылы катары жарыялаган. Ал эми Жалал-Абад шаарында курулуш тармагындагы 67 миллион сомдук иштер аткарылбай калды. Тилекке каршы, жогорку органдар буга алиге чейин баа берише элек.
Жалал-Абад шаарынын мэри Мураталы Тагаев эл алдында шаар тарыхында биринчи курулуш иштерине жергиликтүү бюджеттен 147 миллион сом бөлүнгөнүн айтып келет. Бул чындык, буга чейин мындай үлкөн сумма мурда карала элек болчу.
Мураталы Тагаев өткөн жылдын июнь айында мэр болуп шайланып, эми шаарда иштер катуу жүрө турганын жарыялаган. 2018-жыл да өттү, бирок убада кылынган 67 миллион 398 миң 100 сомдук курулуш иштери аткарылбай кала берди. Шаар мэри бөлүнгөн 147 миллион сомду айткандай тажабайт, бирок 67 миллион сомдук “позорду” негедир айткысы келбейт.
Ошентип, өткөн жылы 80 миллион сомдук гана иштер бүткөрүлүп, пландалган иштердин 55 пайызы гана аткарылды. Буга ким жана качан баа берет?
Быйылкы жылы да жергиликтүү бюджеттен курулуш иштерине өткөн жылдагыдан кем эмес каражаттар бөлүндү. Ага кошумча өткөн жылдагы калып кеткен иштерди аягына чыгарууга да 42 миллион 188,2 миң сом каралды.
Эми алдыга коюлган иштер кандуу аткарылар бекен, же Президенттин ишеними дагы эле жолдо калабы?