Жалал-Абаддык профессор Казакстандын студенттерине онлайн сабак өтө баштады.
Жалал-Абад мамлекеттик университетинин (ЖАМУ) Экономикалык-юридикалык факультетинин «Финансы жана кредит» кафедрасынын окутуучусу, экономика илимдеринин доктору, профессору Аманкул Зулпукаров Мардан Сапарбаев атындагы Түштүк Казакстан гуманитардык институтунун студенттерине онлайн лекция өттү. Лекцияга аталган институттун 1-курсунун бир катар тайпаларынын студенттери катышып, «Микроэкономика» предмети боюнча «Рынок» темасында лекция окулду.
Профессор А. Зулпукаровдун айтымында, Казахстан гуманитардык институтунан координатор болуп экономика илимдеринин кандидаты, доцент «Экономика» кафедрасынын башчысы Азиза Шадиева бул иш-чарага жардам берген. Келишим боюнча 10 саат лекция пландаштырылган, анын ичинен 2 саат лекция окулду.
-Коңшу мамлекеттер менен илим, билим тармагында да достук мамиледе болуп, эки элдин жаштарына өз билимибизди үйрөтүп, илим жаатында ийгиликтерди жасасак дейм. “Мугалим — мөмөлүү дарак” демекчи, артыбыздан чыгаан жаштар өсүп, ийгиликтерге жетишишсе, мен сыймыктанам, – дейт А. Зулпукаров.
Түзүлгөн келишим боюнча Казакстан гуманитардык институтунун илимпоздору да ЖАМУнун студенттерине онлайн-лекция өтүшмөкчү.
