Япониянын калкынын алдында кыйын сыноо турат, 27-апрелден тартып 7-майга чейин император Акихитонун тактан кетиш жана анын чоң уулу, канзаада Нарухитонун тактыга отурушуна байланыштуу майрамдык дем алыш жарыяланат. Эми жапондор бул күндөрү эмне менен алек болушарын билишпей баштары маң. Бул тууралуу дүйнөлүк желеде маалымат таркады.
Деген менен, дал ушул маалдагы туристтик агым күч болуп, туристтерди тейлөөчү кызматтардын өкүлдөрү кыйла кирешелерден кол жууп калышарын айтышууда. Анан да үйдө бала карап, жумушка да чыга турган ата-энелерге кошумча түйшүк жаралууда. Себеби майрам күндөрү балдар бакчалары менен мектептер иштебей, үйдө балдарды караган киши керек болот. Эң кызыгы, көпчүлүк жапондор дем алыш күндөрү эмне менен алек болорун билишпей, баштары ооруп жаткан учур экен.
-Чынын айтсам, кокусунан пайда болгон 10 күндүк дем алышты кантип өткөрүүнү билбей жатам. “Асахи” гезитинин сурамжылоосуна ылайык, суралгандардын 45 пайызы мындай узак дем алышка нааразы болуп жатышат, 35 пайызы гана “бактылуу” экен, — дейт каржы индустриясынын 31 жаштагы өкүлү СейшуСато.
Ошондой эле ExpediaJapan туристтик агенттигинин сурамжылоосунун жыйынтыктарына караганда, жапондор башка өлкөлөрдүн жарандарына караганда жыл сайынкы акылуу эмгек өргүүсүн аз убакытка – 10 күндөн ашпаган мезгилге гана алышат. Суралгандардын 60 пайызы акылуу өргүүгө кеткенде өздөрүн негедир күнөөлүү сезишет.
Деген менен, 2018-жылдын декабрында өлкө парламенти бийлик алмашканда эскисин узатып, жаңысын тосуп алууга бир нече күн дем алыш керектигин тастыктаган.
