Быйыл 1-апрель күнү саат 10:00 чамасында Жалал-Абад шаарынын Кызыл-Мехнат көчөсүндө жайгашкан кургак учук ооруларын дарылоочу ооруканасынын короосунда токтоп турган күмүш түстөгү “Матиз” автоунаасынын эшигинин кулпун белгисиз кылмышкерлер бузуп, Сузак районун тургуну, 1983-жылы туулган М.Н-га таандык болгон 369 миң сом акчасын уурдап кетишкен. Бул тууралуу Жалал-Абад областтык ички иштер башкармасынын басма сөз кызматы маалымдады.
Аталган окуя боюнча 2-апрелде КРнын Кылмыш-жаза кодексинин 200-беренесинин 2-бөлүгү менен 03-032-2019-000559 сандуу өндүрүш иши козголуп, окуя болгон жерге Жалал-Абад шаардык ички иштер бөлүмүнүн тергөө-ыкчам тобу барган жана кароо жүргүзгөн. Текшерүүнүн натыйжасында аталган оорукананын түштүк тарабындагы дарбаза аркылуу белгисиз адам кирип, оорукананын ашканасынын алдында токтоп турган автоунаанын алдыңкы сол тарабындагы эшигинин кулпун бузуп, арткы отургучунун үстүндө турган кара түстөгү сумканын ичиндеги 369 миң сом акчаны жана документтерди уурдап кетишкендиктери аныкталган.
Жалал-Абад шаарынын Транспортный көчөсүндө жайгашкан имараттын биринде орнотулган видео-байкоо тасмасынын көчүрмөлөрү алынып, уурулар ак түстөгү мамлекттик белгиси 08 KG 317 “ACI Тойота Ист” маркасындагы автоунаада изин жашырып кеткендиги аныкталган.
Ыкчам маалыматтар боюнча аталган автоунаа Жалал-Абад областынын Таш-Көмүр шаарынын аймагынан табылып, шектүү катары Ысык-Көл областынын Чолпон-Ата шаарынын 1971-жылы туулган тургуну К.У. кармалды жана тергөө кызматына өткөрүлүп берилди. Учурда тергөө амалдары жүргүзүлүүдө.
