Кошуналардын Ташкент областындагы Уртачирчик районуна караштуу Туябугуз суу сактагычына 2017-жылы июль айында курула баштаган жаңы суу электр станциясы ишке берилди. Бул тууралуу “Народное слово” гезити билдирди
Алынган маалыматка караганда, суу электр станциясынын кубаттуулугу 12 мегаватт-саатка барабар болуп, суу тосмосунун бийиктиги 30 метрге жетип, ал эми суу көлмөнүн көлөмү 250 миллион кубометрди түзөт. Адистердин баамында станция өзүнө кеткен чыгымдарды 4 жылда актап бүтөт, себеби жылына 11 ай бою тынымсыз иштеп турат. Ошондо жыл ичи 41,2 миллион киловатт-саат энергия чыгарып, 1600 кожолукту электр тогу менен камсыз кылат.
Бул суу электр станциясынын курулушунун жалпы наркы 15,8 миллион долларды түзгөн, анын ичинен 8 миллион доллары тышкы инвестиция болсо, 7,7 Миллион доллары “Узбекгидроэнерго” компаниясынын каражаттары эсептелет.
Эске сала кетсек, мурдагы жылы кабыл алынган энергетикалык программага ылайык, Өзбекстан өлкөнүн энергетикалык коопсуздугун камсыз кылуу максатында акыркы 5 беш жылда 42 жаңы суу электр станцияларын курууну жана 32 иштеп жаткан суу электр станцияларын модернизациялоону пландаган. Ушул мезгилде Туябугуз суу сактагычында дагы бир суу электр станциясы, Чоң Фергана каналында кичи суу электр станцияларынын каскады, Ахангаран суусунда “Камчик” кичи суу электр станциясы, Туполанг суусунда “Зарчоб-1” жана “Зарчоб-2” кичи суу электр станцияларынын каскады курулууда.
