Өзбекстандын Сырдарья областындагы суу ташкынынан жабыр тарткан жарандарга өкмөт тарабынан 4 миң долллардан жардам берилет. Андан тышкары, алардын үйлөрү жана батирлери акысыз калыбына келтирилет. Бул тууралуу Podrobno.uz жаңылыктар агенттиги кабарлады.
Сырдарья областындагы суу ташкындарынан жабыр тартып, үйлөрүнөн жана батирлеринен ажыраган өзбекстандыктарга камкордуктар көрүлөт. Аларга 40 миллион сумдан (болжол менен 4 миң доллардан) жардам берилет. Ошондой эле кыйраган үйлөрү жана батирлери акысыз калыбына келтирилет. Өзбекстандын президенти Шавкат Мирзиёев Сардөбө районунун калкы менен жолугушууда аларга ушундай убада берди.
Президент үйлөрдү оңдоп-түзөө, жаңыдан куруу мамлекет тарабынан акысыз жүргүзүлөрүн айтты. Анан да 1-сентябрга чейин жабыр тарткан жарандар жаңы үйлөргө көчүп кире алышат. Ошол эле учурда кыйраган үйлөрүнүн алдындагы жер участкалары жабыр тарткандардын ээлигинде кала берет.
Суу ташкынынан жабырланган 4,5 миң үй ээлеринин ар бирине 40 миллион сум жана телевизор, муздаткыч, кир жуугуч машина, кичи мештер, электр чайнектери, үтүк сыяктуу турмуш-тиричилик техникалары белек кылынат. Бул максатта өзбек миллиардери Алишер Усманов тарабынан 10 миллион доллар акча бөлүнгөн. Андан тышкары да акимчиликтер, министрликтер жана ведомстволор, чарбалык бирикмелер, ишкерлер да демөөрчүлүк жардамдарын берип жатышат.
Сырдарья областынын Сардөбө районундагы жабыр тарткандарга жардам сертфикаттары жана банктык карталар тапшырылган.
