Жалал-Абад областындагы бир катар аймактар 2020-жылы боло турган эл каттоого жеткиликтүү даяр эмес. Бул тууралуу Өкмөттүн Жалал-Абад областындагы өкүлчүлүгүндө өткөн коллегияда айтылды.
Эң биринчиден алдыдагы эл каттоо жана анын мааниси тууралуу эл арасында маалымат жетишсиз. Калк арасындагы маалымат жетишсиздиги Чүй областындагы сынамык эл каттоодо анык болду. Бул маанилүү өнөктүк боюнча элге маалыматты толук жеткирүүнү жергиликтүү бийликтер борбордук көчөлөргө маалыматтык баннерлерди илүү менен баштоосу керек эле, бирок ал иш аткарыла элек.
Ошондой эле эл каттоону уюштурууда турак-үйлөргө катар номурларды коюунун да мааниси бар, бирок бул иш да жергиликтүү бийликтер тарабынан колго алынбай жатканы өкүнүчтүү. Жалал-Абад областтык статистика башкармалыгынын башчысы Жандаралы Садыралиевдин билдиришинче, Жалал-Абад шаарында, Ала-Бука, Аксы жана Базар-Коргон райондорунда аталышы жок көчөлөр жана катар номуру коюлбаган үйлөр көп. Ошондуктан да шаар мэриясы менен райондордогу айыл өкмөттөрү бул маселени тез арада чечүүсү тийиш. Анткени, 1-июлга чейин Жалал-Абад областында 250дөн ашуун көчөгө катар номурлар коюлушу шарт.
Эске сала кетсек, эл каттоо өлкөдө ар он жылда бир жүргүзүлөт, Быйылкы каттоо 2020-жылдын 23-мартында башталат.
