Быйылкы жылы Жалал-Абад областында жалпысынан 156 миң 284 гектар аянтка айыл чарба эгиндерин эгүү пландаштырылган. Бул тууралуу КР Өкмөтүнүн областтагы ыйгарым укуктуу өкүлүнүн аппаратынан билдиришти.
Алынган маалыматка караганда, дан эгиндерин жана чанактуу өсүмдүктөрдү эгүү аянты 62 миң 700 гектарды түзөт. Анын ичинен буудай 16 миң 200 гектарды, арпа 8600 гектарды, дандык жүгөрү 32 миң 700 гектарды, чанактуу дан өсүмдүктөрү 600 гектарды, башка дан өсүмдүктөрү 4600 гектарды ээлемекчи.
Техникалык өсүмдүктөрдөн пахта 13 миң 400 гектарга, тамеки 55 гектарга, май өсүмдүктөрү 13 миң гектарга, картошка 9100 гектарга, жашылча 11 миң 900 гектарга, бакча өсүмдүктөрү 3747 гектарга, жалпы тоют өсүмдүктөрү 42 миң гектарга эгилүүсү күтүлүүдө.
Жазгы талаа жумуштары областтын Аксы, Ала-Бука, Базар-Коргон, Ноокен, Сузак райондорунун жаз эрте келген аймактарында, Жалал-Абад, Таш-Көмүр шаарларында жүргүзүлүп жатат. Быйылкы 26-мартка карата 21 миң 430 гектар айыл чарба жерлери айдалып, алдыга коюлган план 32 пайызга аткарылган. Анын ичинде 1998 гектарга жаздык буудай себилип, план 53 пайызга, 5554 гектарга арпа себилип, план 67 пайызга, 1388 гектарга картошка айдалып, план 15 пайызга, 2742 гектарга жашылча эгилип, план 23 пайызга, 3226 гектарга май өсүмдүктөрү эгилип, план 25 пайызга аткарылды.
