Быйылкы жазгы талаа иштерине карата айыл чарба техникаларын даярдыкка келтирүү иштери жүрүп жатат. Өткөн аптага карата област аймагында колдо бар 2761 даана трактордун 2259у же 82 пайызы даярдык сабына коюлду. Бул тууралуу КР Өкмөтүнүн областтагы ыйгарым укуктуу өкүлүнүн аппаратынан билдиришти.
Алынган маалыматтарга караганда, эгин эгүү үчүн колдо бар 1327 соконун 1258и же 95 пайызы, 2773 даана маланын 24302 же 88 пайызы, 322 эгин сепкичтин 299у же 93 пайызы, 586 жөөк аралыктарын иштетүүчү культиватордун 488и же 83 пайызы даярдыкка келтирилди.
Областта дыйкан-фермерлерге кызмат кылуучу 19 техникалык сервис, анын ичинде 7 муниципалдык жана 12 жеке менчик, бир саясий партияга караштуу 6 машина-трактор станциялары иштеп жатат.
Быйыл айыл чарба иштерин жүргүзүүгө 13 миң 418 тонна дизелдик күйүүчү зат (солярка), 3604 тонна автобензин, 519 тонна дизелдик май, 229 тонна автол керектелет. Учурда област аймагындагы май куюучу жайларда дизелдик күйүүчү майдын литри 43-47 сомдон, автобензиндин литри 38-45 сомдон сатылууда. Керектүү күйүүчү жана майлоочу каражаттар жетиштүү деңгээлде бар.
