Жыл сайын дүйнө боюнча 30 миллиард доллар көлөмүндөгү мөмө-жемиштер жыйналбай, бутактарда же жерде чирип кетет. Эки апта жыйналбай туруп калган жемиштер да өзүнүн сапатын 80 пайыз жоготуп коёт, көп чыгашага алып келет. Эми бул көйгөйдү жоюуга дрондор тартылмакчы. Бул тууралуу FreshPlaza басылмасына шилтеме берүү менен EastFruit платформасы жазып чыккан.
Акыркы жылдары мөмө-жемиштерди жыйноочулардын жетишпестиги кескин билинип, даяр продуктылар жөн эле чирип жатканы көйгөйгө айланды. Жакында эле интернет айдыңында Улуубританиянын фермелеринин 70 миллион жашылча жана мөмө-жемиши жыйналбай талаада калганы кабарланган. Ал эми 2050-жылдарга барып 5 миллион сандагы жыйноочулардын жетишпестиги пайда болору алдын ала эсептелип чыкты. Азыркы учурда дүйнө боюнча бардык мөмө-жемиштердин 10 пайызы жыйналбай калууда. Бул жалпы Европа Биримдигинин өлкөлөрүнүн муктаждыгын жапканга жарайт.
Израилдик Tevel Aerobotics Technologies стартабы базалык станциядан учуп чыгып, бышкан гана мөмөлөрдү терип, аны этияттык менен идишке салган автономдук учуучу дрондорду иштеп чыкты. Булар кишилер эмес, дрондор болгону үчүн убакытты кетирбей эле аларды сутка бою жана деп алыш күнсүз иштете берсе болот. Алар чарчашпайт, утуру кофе ичип турушпайт жана ажатканага да чуркашпайт.
Дрон-роботтор газ жана электр тогу менен иштемекчи жана жасалма интеллект менен камсыздалып, мөмөнүн бышкан-бышпаганын ажырата алат, сатууга жарабай калган мөмөнү идишке салбай, сыртка ыргытат. Дронду иштеп чыккан компаниядагылар роботтун тийиштүү эсептегичтер жана камера менен жабдылганын айтышат. Булар азырынча пилоттук режимде иштешүүдө, бирок келечекте зор потенциалга ээ.
