Жалал-Абад шаарында алгачкы түзүлгөн адам укуктарын коргоочу “Справедливость” бейкмөт уюму Бүткүл дүйнөлүк кыйноолорго каршы уюмуна мүчө болду. Буга чейин Жалал-Абад областынын аймагындагы бейөкмөт уюмдары мындай эл аралык мартабалуу уюмдарга түз мүчө боло элек болчу. Бул тууралуу интернет басылмалар кабарлашты.
“Бүткүл дүйнөлүк кыйноолорго каршы уюму” деп аталган адам укугун коргоочу бейөкмөт уюмдарынын эл аралык бирикмеси дүйнөдөгү эң ири жана таасирдүү укук коргоо жамааты эсептелет. Ал дүйнөдөгү адам укуктарын коргоочу 300 ар кандай бейөкмөт уюмдарынан турат жана инсандын кол тийгисти үчүн күрөш алып барат. Адамдын мыйзамсыз себептер менен кармалышына, эркинен ажыратылышына, куугунтукталышына, ар кандай азап берүүлөргө каршы чараларды уюштурат. Бул бирикмеге кошулган бейөкмөт уюмдары “ SOS-Torture” деп аталган тармакка биригишип, ар кайсы өлкөлөрдө ондогон миң кабарчылары иштешет.
Ал эми адам укуктарын коргоочу «Справедливость» уюму Жалал-Абад шаарында 1994-жылдан бери иштеп келет. Адамдын укуктары жана эркиндиктери багытында элге акысыз укуктук жардам берет. Бул уюмдун түзүүчүлөрүнүн бири Валентина Гриценко аны бир топ жылдардан бери жетектеп келет. Ага чейин бул уюмдун жаралышына жана түптөлүшүнө маркум, шаардагы сүрөт мектебинин, “Славянская диаспора” уюмунун мурдагы жетеккчиси Валерий Улеев эмгек жасаган.
“Справедливость” уюмунун мүчөлөрү бир топ жылдардан бери кыйноолорго каршы чараларды жүргүзүү менен Жалал-Абад областынын аймагында адам укуктарынын корголушуна, укуктук аң-сезимдин жогорулашына салым кошуп келишет.
